مراتب الحرية المالية | في اي مرتبة انت ؟

 • الحرية المالية: هي أن يكون عندك مال يغنيك عن العمل. أن يكون وقتك كله ملكك تفعل به ما تشاء.

 • الحرية المالية لا تدعو لترك العمل، ولكن تدعو لأن تعمل باختيارك في المجال الذي يناسبك وبالطريقة التي

تروق لك.

• حتى الأشخاص السعداء في وظائفهم عليهم تعلم مفهوم الحرية المالية لأنهم ببساطة سيصلون يوماً ما إلى

سن التقاعد، وقد لا يكون الراتب التقاعدي كافٍ بالنسبة لهم.

• للوصول للحرية المالية، علينا السعي لامتلاك استثمرات تدر علينا عوائد مالية بدون الحاجة للعمل. هذه

الاستثمارات تسمى (أصول) والمال الذي نجنيه منها يسمى (دخل ساكن) لأنه لا يتطلب الجهد.

يمكن اكثر كلمة تسمعها في عالم تنمية الذات في هذه الايام الحرية المالية. خطوات الحرية المالية الحرية المالية حلم الجميع.

 ما الذي يمنعك من الوصول للحرية المالية؟

 لكن بصراحة لاحظت ان اكثر من  يتكلم عن هذا الموضوع ما يتعب نفسه ويوضح ماهي  الحرية المالية بالضبط وماهي  انواعها.

 فاليوم بنتكلم باختصار عن الحرية المالية ومراتبها.

 واذا تريد تعرف في اي مرتبة انت تابع .

تعريف بسيط لمصطلح الحرية المالية.

 الحرية المالية :هي ان يكون عندك مبالغ  تغنيك عن العمل. يعني توصل لمرحلة انك غير  مضطر تشتغل في وظيفة ما تحبها  انت تقدر تشتغل لو تحب لكن ما انت مضطر انك تشتغل. يعني نقدر نعرف الحرية المالية ان وقتك يكون بالكامل ملكك انت. تقدر تسوي فيه اللي تريد.

يعني مثلا افرض  ان عبدالله  ورث من ابوه مبلغ عشرة  مليون دولار. وعبدالله يعرف اهو مصاريفه السنوية تقريبا مئة الف دولار. فلو قسمنا عشرة مليون على مئة الف معناها الورث هذا الى ثمانين سنة قدام وما راح يضطر انه يشتغل بعد اليوم ابدا.

 هنا نقدر نقول ان عبدالله  وصل للحرية المالية.

بس لحظة ما كل الناس مثل عبدالله  يورثون ملايين صح?

يعني هل معنى هذا الكلام انه خلاص ما راح نقدر نوصل للحرية المالية لا ابشرك الامر ممكن وممكن جدا بعد بس محتاج  له شوية نباهة وصبر.

 نحتاج انه يصير عندنا حاجة نسميها اصول. وهذي الاصول تجيب لنا حاجة نسميها الدخل الساكن .

شنو يعني أصول؟  الاصول يعني عقارات. مشاريع تجارية اسهم الى اخره. وهذي الاصول تجيب لنا مبالغ  سميها دخل ساكن بمعنى انه ما نحتاج نشتغل حتى نحصل هذا الدخل. الدخل هذا يجينا من غير جهد حقيقي. يعني الاجار وارباح المشروع والاسهم بتجيك وانت قاعد في بيتكم مرتاح ومبسوط من غير ما تشتغل لك كل يوم ثمان ساعات.

اذا تذكر عشان نوصل للحرية المالية نحتاج يكون عندنا اصول تجيب لنا دخل ساكن من غير شغل. يغطي هذا الدخل مصاريفنا واحتياجاتنا. طيب عرفنا الان الحرية المالية فخلينا نشوف ماهي  مراتب الحرية المالية.

 اول مرتبة هي المرتبة 0 :

وهي  نسميها الاعتماد المالي ومعناها ان دخلك اقل من نفقاتك يعني لازم تعتمد على احد ثاني يدعمك ماديا وهذي المرتبة هي كلنا بدينا فيها على فكرة لان كلنا اعتمدنا في بداية حياتنا على ابائنا وامهاتنا عشان يصرفون علينا. المشكلة على فكرة ان البعض يبقى في حالة الاعتماد المالي حتى وهو موظف.

يعني يبقى وهو موظف دخله اقل من مصاريفه. هذه مشكلة كبيرة.

 المرتبة 1 :

هي الملاءة المالية. وهي  معناها ان دخلك يغطي نفقاتك. يعني الحمد لله راتبك يكفيك والله مغنيك عن الناس. لكن يمكن ما بعد تجمع لك مبلغ  للطوارئ ويمكن لسا عليك ديون ما سددتها وهنا نجي للمرتبة رقم 2

المرتبة 2 :

وهي  اسمها الاستقرار المالي. ومعناها انك جمعت لك مباغ  وضميتهم على جنب للطوارئ. يعني اسست ما يسمى بصندوق الطوارئ. واللي يساوي مصاريفك الشهرية ضرب ستة.

المرتبة 3:

 هي مرتبة اطفاء الديون. ومن اسمها معناها انك الحمد لله سددت كل الديون اللي عليك. وما احد يلحقك بشيء. فلو انت ما عليك اي دين معناها انت وصلت للمرحلة الثالثة. من الآن وصاعد ما راح نقدر نرتقي في مراحل او مراتب الحرية المالية الا لما يكون عندنا يسمى بالاصول اللي تكلمنا  عنها قبل واللي تجيب لك دخل  من غير ما تشتغل. والله عاد عندك عمارات اسهم بزنس المهم اصول تجيب لك دخل  بدون جهد.

 المرتبة 4 : هي الامان المالي.

ومعناها ان دخل اصولك يغطي الحد الادنى من حاجاتك يعني انت لو اليوم تركت الوظيفة فان دخلك الساكن اللي يجي من اصولك بيغطي الحاجات الاساسية في حياتك. اللي هي السكن النقل الملبس الطعام الخدمات الى اخره. دخلك هذا بيغطي الحد الادنى لكن طبعا ما بتكون مرتاح تماما  ومبحبح كذا لا في رفاهية ولا ما يحزنون لكن مجرد وصولك لهذه المرحلة معناها انك بديت تشعر بطعم الحرية وانك فعلا اقل اعتمادا على الوظيفة .

 المرتبة 5 :

 هي الاستقلال المالي. ومعناها ان دخل اصولك ممكن يغطي نفس مستوى المعيشة والرفاهية اللي انت عليها الان. حتى لو تركت الوظيفة من اليوم. يعني يكون عندك عمارات  اسهم وتدخل  لك مبالغ تعيشك بنفس مستوى عيشتك الان .

المرتبة 6  :

هي الحرية المالية. ومعناها ان داخل اصولك وممتلكاتك كافي  يعيشك نفس مستوى المعيشة اللي انت فيه الان وبيخليك تحقق اهداف حياتية اضافية لو تبي. يعني حتى لو اليوم تركت الشغل راح تعيش بنفس مستوى عيشتك لا وابشرك وبتقدر تزوج عيال وتسافر مع العائلة كل سنة ممكن حتى تسوي لك مشروع على خفيف لو تحب مرتاح ولله الحمد وهذا مستوى بوجهة نظري جدير ان الانسان يسعى له بجد لانه فعلا يخلي وقتك ملكك.

اما المرتبة 7 والاخيرة  :

فهي مرتبة الوفرة المالية. والتي  تتحقق لما يكون دخل اصولك اكثر من اللي بتحتاجه بكثير الى الابد. تمام  يعني نقدر نقول لما تصير محتار وين تودي اموالك من كثرتها. هذي الوفرة المالية. حدد في اي المراتب الان انت .